Qirjako: Uroj që Gramozi të ketë fat me Apoloninë
Gramozi i ka humbur të gjitha ndeshjet në transfertë, me përjashtim të asaj në Gramsh, ku arriti të fitonte. Në analizën e humbjes në Lezhë, trajneri Ilir Qirjako vuri në dukje "sëmundjen” e këtij kampionati për ekipin e tij, shpërdorimin e rasteve.
"Kemi gabuar në disa raste nga ato që quhen të pastra dhe kjo është e pafalshme për një ekip pretendent. Eshtë pikërisht ky fenomen, që po e dëmton sistematikisht Gramozin. Pësuam gol që në fillim, por më pas ekipi e mori veten dhe po e kontrollonte lojën. Sulmuam dhe krijuam shumë raste, por goli i barazimit nuk u arrit.
Duke qenë të gjithë në sulm, në fund pësuam golin e dytë në minutën e 3 të shtesë. Megjithatë, kur llogarit forcën dhe agresivitetin e kundërshtarit, them se është një humbje e pranueshme. Nuk ka arsye të heqim dorë nga pretendimet tona. Presim Apoloninë këtë javë dhe duhet patjetër të mos humbasim pikë të tjera.
Për të fituar duhet edhe pak fat dhe shpresoj që ta kemi me Apoloninë. Gjatë punës tonë për këtë ndeshje do të përqendrohemi te lojtarët e sulmit. Përpara kemi dy sfida të rëndësishme, pasi pas Apolonisë vjen Mamurrasi në Ersekë dhe dy fitore radhazi do të na bënin shumë punë.
Janë dy ndeshje vendimtare në lidhje me objektivin tonë dhe, nëse ia
arrijmë qëllimit, do të jemi në 4-shen e parë, që të çon direkt në
superligë,” - thekson trajneri kolonjar, Qirjako.
Nga '' Sporti Shqiptar '' , E Merkure 09 Shkurt 2011
Publikoje ne rrjetet sociale :