Kolonjarët do të luajnë më 22 janar me Adën dhe po shpejtojnë për kompletimin e ekipit
Gramozi do ta rinisë kampionatit më herët se ekipet e tjera, sepse më
22 janar do të luajë ndeshjen e prapambetur me Adën. Kjo datë po
afrohet me shpejtësi dhe grupi kolonjar i ka intensifikuar përgatitjet,
nën drejtimin e trajnerit Ilir Qirjako dhe ndihmësit të tij, Sokol
Hitajt. Veç stërvitjes së ngjeshur, stafi teknik ka planifikuar dhe ndeshje
miqësore gjatë këtyre dy javëve, duke synuar konsolidimin e ekipit.
Miqësorja e parë do të luhet ditën e diel, kur mendohet të jetë mbyllur
edhe merkatoja e Gramozit. Për "Sportin shqiptar”, trajneri Qirjako
thotë:"Tashmë Gramozi ka hyrë në një fazë interesante të procesit
stërvitor. Grupi do të jetë i gatshëm për ndeshjet e fazës së dytë të
kampionatit. Natyrisht që ne i kemi kushtuar rëndësi të veçantë
përgatitjes fizike dhe pjesëmarrja e futbollistëve ka qenë e plotë. Të gjithë janë të angazhuar në shkallën më të lartë për të marrë
maksimumin dhe për të zbatuar me përpikëri çdo këshillë tonën. Jam
optimist për fazën e dytë, pasi shoh që i kemi rritur parametrat. Do të
luajmë disa miqësore me ekipe të kategorisë së parë dhe të dytë. Nuk kemi vendosur se cili lojtar do të qëndrojë dhe cili do të
largohet nga ekipi, pasi merkaton nuk e kemi mbyllur. Do të thosha se
Gramozi do të ketë një tjetër fytyrë në fazën e dytë dhe do t’i vazhdojë
me vendosmëri përpjekjet për një nga 6 vendet e para.” Në kampin kolonjar vijnë dhe ikin lojtarë. Në Ersekë ka ardhur ditët e
fundit një sulmues nga Patosi, Lulëzim Çobaj, i cili fazën e parë
luajti me Butrintin. Më parë ai është aktivizuar edhe me Bylisin,
Albpetrolin e Naftëtarin. Duket se trajneri Qirjako është i kënaqur me
gjendjen e tij, por ende nuk e ka dhënë "ok” in, pasi kërkon që ta shohë
edhe disa ditë.
Lena: Jam lojtar i Gramozit
Duke u nisur nga zërat e ditëve të fundit për një largim të mundshëm
të Bledar Lenës drejt Luftëtarit, ka reaguar vetë lojtari. "Në fakt, më
ka ardhur një ftesë nga Luftëtari, por për momentin jam lojtar i
Gramozit. Kam një kontratë me këtë ekip dhe për këtë arsye nuk mund të
largohem, aq më tepër që në Ersekë, gjatë tri sezoneve që po luaj, kam
gjetur një ambient tepër të këndshëm,” - ka sqaruar Lena.
Vëllezërit Dine, nga Greqia në Ersekë
Ekipit kolonjar i janë shtuar dje në stërvitje dy futbollistë të ardhur nga Greqia. Ata janë vëllezërit Johan Dine, 22 vjeç, dhe Mihal Dine, 19 vjeç. Të dy kanë qenë në ekipet e moshave të Panathinaikosit dhe sezonin e fundit kanë qenë pjesë e Ismiakos Korinthit. Janë të dy mesfushorë dhe e kanë pranuar ftesën e trajnerit Qirjako që të luajnë fazën e dytë me Gramozin. Johani ishte në provë edhe sezonin e kaluar, kur Gramozi luajti në superligë, por ardhja e shumë lojtarëve e ka lënë jashtë ekipit. Ai është një oraganizator me të dhëna të mira.
Nga '' Sporti Shqiptar' ' , E Shtune 15 Janar 2011
Publikoje ne rrjetet sociale :