Gramozi i ri mbetet enigmatik, pritet fundi i qershorit
Dy nga emrat që qarkullojnë janë mbrojtësi Kote dhe portieri Toçi, por asgjë nuk është zyrtare për momentin
Për
sezonin e ardhshëm është thënë se do të jetë një ekip pretendent, por,
kur nuk ka ende vendime zyrtare, në skenë dalin emra të ndryshëm, që në
fakt nuk është se janë të gjithë në kuadrin e thashethemeve. Kolonjarët
do të riorganizohen në fund të qershorit, ndërkohë që drejtuesit çdo
ditë mendojnë dhe punojnë në drejtim të merkatos. Kuptohet që suksesi
është i varur drejtpërdrejt nga cilësia e grupit të futbollistëve,
kështu që detyra më e rëndësishme është afrimi i disa elementëve
cilësorë dhe me përvojë. Drejtuesit janë të rezervuar dhe nuk bëjnë të
ditur asnjë emër, sepse bisedimet mund të dështojnë. Ata janë shprehur
se emrat do të publikohen pasi të jetë firmosur kontrata, ndërkohë që
pranojnë faktin se janë në komunikim të vazhdueshëm me lojtarë të
ndryshëm.
Kote - Një nga emrat që qarkullon në ambientin futbolldashës kolonjar është ai
i mbrojtësit korçar Gerti Kote, i cili luajti me Bilisht Sportin
sezonin e fundit. Nga burime të sigurta mësohet se Kote është takuar dje
me trajnerin Ilir Qirjako, por ky i fundit e mohon këtë fakt, duke u
shprehur me diplomaci se më parë te Gramozi duhet garantuar ana
financiare. Gjithsesi, korçari duket se është një alternativë për
kolonjarët.
Porta
- Një nga çështjet kryesore të merkatos kolonjare lidhet me portën,
pasi dihet që Gramozi, në fazën e dytë të kampionatit të fundit, pas
dëmtimit të portierit Nuredini dhe largimit të Këndezit, mbeti me një
portier shumë të ri në moshë, pa përvojë me ekipin e të rriturve.
Trajneri Qirjako duket se e ka ftuar përsëri elbasanasin Irakli Toçi, i
cili ka qenë pjesë e Gramozit në superligë dhe sezonin e fundit u
aktivizua me Luftëtarin.
"Jo” brazilianëve
- Nga trajneri Ilir Qirjako mësohet se dy nga brazilianët i kanë
kërkuar që të kthehen në Ersekë, por ai u ka dhënë përgjigje negative.
Bëhet fjalë për mesfushorin Oliveira dhe mbrojtësin Martins. Përgjigja negative e trajnerit Qirjako ka ardhur për
shkak të mënyrës si brazilianët u larguan nga ekipi gjatë sezonit të
fundit, duke e lënë Gramozin në mes të rrugës për interesin personal.
Nga '' Sporti Shqiptar '' , E Shtune 04 Qershor 2011
Publikoje ne rrjetet sociale :